2008年全港中學生中國象棋個人比賽
編號441 譚海寬
全部有185個人參加高中組
每人限時10分鐘自由時間,其實時間真係唔係好夠,
不過話對戰10場,10am至6pm,又係冇乜時間
以計分賽進行,勝 - 1分, 和 - 0.5分, 負 - 0分
本來編左第93號枱,不過唔夠位...要等人地捉完,
我先可以坐去36號捉第1場
等我總結下每場比賽
第1場 勝
大會雖然好多人參加,但係有一部份冇黎到,
第1場就係因為對手冇黎到,不戰以勝
本來話10分鐘唔黎就當輸,不過我過左10分鐘之後,
先有人同我講要禁個計時個鐘先開始計.
咁我又要等多10分鐘先出去報分......
第2場 勝
個對手唔係好勁,加埋佢又輸盲棋,
俾我抽左隻車,再加上我將死佢個步又係睇唔到,
咁樣輕輕鬆鬆又過關
第3場 輸
超唔服,明明贏硬,都係因為衰在貪心
因為我貪心,係要食埋佢隻象,就係咁,
隻車一沉底,就再冇回頭......
番唔到黎防守,俾佢隻馬有機會衝到過黎...
其實我平日捉好多次都係大好形勢,
但係就係貪隻死人象,就咁輸左...
唔食象咪去頂住佢隻馬囉,仲好,驚乜佢個中炮姐!
我下次唔會再犯呢個錯!
第4場 輸
同個女仔鬥,留意,係一個死豬扒!
之前都睇過佢捉一局,都知唔易對付,
不過真係俾佢控制住個局,
佢隻炮一落黎沉到底,係我隻車隔離,
又俾佢隻車看住,食唔到,我又岩岩上左個邊士,
落唔到,之後俾佢雙車雙炮衝哂過黎,乜都郁唔到,
成場處於被動狀態.
諗下諗下,我其實應該一早就搏左佢隻炮.都仲有機會贏架.
真係丫,死開啦死豬扒,你話係個靚女輸左個時握手都捉實佢隻手丫
呢個?死開啦!不過講真,唔好睇少d女仔...參加得比賽都有番咁上下
第5場 和
呢局去到中段成功捉到佢盲棋,食左佢車,心諗贏硬,
連贏既機會都黎到啦!佢睇唔到我將得死佢!
不過...就係連我都睇唔到我可以贏...
明顯地,我冇行到個步佢成個人鬆哂,真係好明顯地...
最後我只係得雙車,佢一車一馬.
俾佢搏埋隻車,佢又士象全,就咁和左,真係好唔抵囉!
第6場 勝
嘩..呢個人真係好衰仔,佢得1隻車,我有1車1炮+2卒,
仲破左佢1象,明顯地有優勢,不過d卒未篤到落去,
佢竟然趁個時話要數30步冇食棋當和棋,
嘩,佢真係痴膠花!我會俾佢搏和?我係咁食左佢士都得啦
o係佢同裁判提出和棋後,我走車捉佢象,佢3將我,想多d步數和棋,
想創你個心啦!食佢象,睇唔到我炮第2邊將緊.就咁輸左,抵你死啦!
第7場 負
最後呢場俾我遇到個張祝珊既人,我都知佢地勁架啦,
不過其實開始係有微微既優勢,不過俾佢1個連環炮,
抽車or抽象,走車食象,蝕隻象算數,點知佢一上馬抽雙車..
頂..真係睇唔到,蝕左隻車真係咩心情都冇哂..點贏..
所以捉捉下都唔知已經變成咩樣...
其實放lunch之前只係捉得1局,之後要捉多9場真係唔夠時間.
所以都係只係捉得7局
最後3勝3負1和.總分3.5,都唔錯架啦~
睇俾埋排名先走,呵呵,前過盧國恩~~
確實排第幾都係唔講啦~~
出面比賽係唔同d,人地既陣法同行法變化好大
我都係要繼續努力先得啦~~
最後集合我地4個參賽者既觀點所得,
所有D勁人個樣都著實係1個木咀,
所以呢,技術同埋個樣係成反比既,
唉...怪唔得知我咁水皮啦...
Appendix:
http://www.hkcca.org.hk/hkcca/result081116c.htm我 第75名
Chatboard (0)